ഏറെ പ്രത്യേകതകളുള്ള പുതിയ 12 ഇഞ്ച് മാക് ബുക്കുമായി ആപ്പിൾ. താരതമ്യേന കനം കുറഞ്ഞ ഈ മാക്ബുക്കിന് 920 ഗ്രാമാണ് ഭാരം. പുതിയ കീ ബോർഡ് സ്വിച്ച് സംവിധാനവും ടച്ച് സെൻസിറ്റീവ് ട്രാക്ക് പാഡിന്റെ നവീകരിച്ച രൂപകൽപ്പനയുമാണ് പുതിയ മാക്ബുക്കിന്റെ കനക്കുറവിനുള്ള പ്രധാന കാരണങ്ങൾ. മാക് ബുക്കിന്റെ പുതിയ വേരിയന്റിന്റെ അവതരണത്തിനൊപ്പം വിപണിയിലുളള 13 ഇഞ്ച് മാക് ബുക്ക് എയർ പിസികൾ 8 ജിബി റാമിനൊപ്പം നേരത്തേയുള്ള വിലയ്ക്ക് തന്നെ ലഭ്യമാക്കുമെന്നും ആപ്പിൾ അറിയിച്ചു.

ഇന്റൽ ആറാം തലമുറ സ്കൈലേക് ആർക്കിടെക്ചർ അടിസ്ഥാനമാക്കിയുള്ള കോർ എം പ്രോസസറാണ് പുതിയ മാക് ബുക്ക് വേരിയന്റിൽ ഉപയോഗിച്ചിരിക്കുന്നത്. മെച്ചപ്പെടുത്തിയ ബാറ്ററി ബാക്കപ്പാണ് പുതിയ 12 ഇഞ്ച് വേരിയന്റിന്റെ മറ്റൊരു പ്രത്യേകത. 10 മണിക്കൂർ വരെ തുടർച്ചയായ ഇന്റർനെറ്റ് ഉപയോഗത്തിനും 11 മണിക്കൂർ വരെ തുടർച്ചയായുള്ള വിഡിയോ പ്ലേബാക്കിനും ഈ ബാറ്ററി മാക് ബുക്കിനെ സഹായിക്കുമെന്ന് ആപ്പിൾ അവകാശപ്പെടുന്നു.

നേരത്തേ 12 ഇഞ്ച് മാക് ബുക്കുകളിൽ ഉപയോഗിച്ചിരുന്ന റാമുകളേക്കാൾ താരതമ്യേന ഉയർന്ന വേഗമുള്ള റാമാണ് പുതിയ മാക് ബുക്കിൽ ആപ്പിൾ ഉൾപ്പെടുത്തിയിരിക്കുന്നത്. വേഗത്തിലുള്ള ബൂട്ടിംഗിനും സോഫ്റ്റ് വെയർ / ഡാറ്റാ ലോഡിംഗിനും റാമിനൊപ്പം ഉപയോഗിച്ചിരിക്കുന്ന പിസിഐ - ഇ അധിഷ്ഠിതമായ ഫ്ലാഷ് സ്റ്റോറേജ് സഹായകമാകും. പുതിയ തലമുറ ഐപാഡുകളിലും ഐഫോണിലും ആപ്പിൾ നടത്തുന്ന വർണ്ണ വൈവിധ്യ പരീക്ഷണം മാക്ബുക്കിലും തുടരുന്നുവെന്ന് വ്യക്തമാക്കുന്നതാണ് റോസ് ഗോൾഡ് നിറത്തിൽ പുറത്തിറക്കിയ പുതിയ മാക്ബുക്ക് വേരിയൻറ്.

2304x1440 പിക്സൽ റെസലൂഷൻ നൽകുന്ന റെറ്റിന ഡിസ്പ്ലേയോട് കൂടിയ 12 ഇഞ്ച്‌ മാക്ബുക്കിന്റെ പുതിയ വേരിയന്റിൽ ഇന്റൽ എച്ച്ഡി 515 ഗ്രാഫിക്സ് ഉൾപ്പെടുത്തിയ 1.1 ജിഗാ ഹെട്സ് വേഗത നൽകുന്ന കോർ എം 3 സിപിയുവാണ് ഉപയോഗിച്ചിരിക്കുന്നത്. 8 ജിബി റാം, 256 ജിബി സംഭരണ ശേഷി എന്നിവ നൽകുന്ന മോഡൽ മാക്ബുക്കിന്റെ വില 1,06,900 രൂപയാണ്. ഇതേ മാക് ബുക്ക് 1.2 ജിഗാ ഹെട്സ് വേഗത നൽകുന്ന കോർ എം 5 സിപിയു ഘടിപ്പിച്ച് 512 ജിബി സ്ടോറേജ്‌ ശേഷിയോട് കൂടിയ മറ്റൊരു കസ്റ്റം മോഡൽ ആയി 1,29,900 രൂപയ്ക്ക് വാങ്ങാൻ കഴിയും.